Հայսատանի Ազգային անվտանգության ծառայությունը (ԱԱԾ) ձերբակալել է նախկին արտգործնախարար, կառավարությունը բարձրագոչ քննադատող Ալեքսանդր Արզումանյանին որպես փողերի լվացման կասկածյալ, ինչը ընդդիմության ղեկավարների կարծիքով անճկուն փորձ է լռեցնելու կառավարության ընդդիմախոսներին մայիսի12 –ին կայանալիք խորհրդարանական ընտրությունների նախօրյակին:

Արզումանյանը ձերբակալվել է մայիսի 7-ի ուշ երեկոյան, երբ աշխատանքից վերադառնում էր տուն: Նա “Քաղաքացիական անհնազանդություն շարժում” հասարակական կազմակերպության նախագահն է: Արզումանյանի կինը` Մելիսսա Բրաունը, EurasiaNet-ին հայտնեց, որ կալանքից առաջ Արզումանյանին թույլատրել են կատարել մեկ հեռախոսազանգ, եւ նա կնոջը հավաստիացրել է. “ նրանք ոչ մի հիմք չունեն մեղադրելու ինձ”:

Արզումանյանի փաստաբանը` Հովիկ Արսենյանը, EurasiaNet-ին հայտնեց, որ նախկին արտգործնախարարը ներկայումս պահվում է Երեւանի “Կենտրոն” բանտում: “Այս պահին նա կալանքի տակ է պահվում որպես կասկածյալ”, - ասաց Արսենյանը: “Հուսով եմ նրանք այս սահմանը չեն անցնի”: Գործի կապակցությամբ մայիսի 5–ին խուզարկություն է անցկացվել Արզումանյանի բնակարանում եւ գրասենյակում: [Մանրամասները տես Eurasia Insight archive.]

Ըստ օրենքի, քննիչներն ունեն 72 ժամ որպեսզի կամ փողերի լվացման մեղադրանք ներկայացնեն Արզումանյանին կամ նրան ազատ արձակեն:

Նախկին փոխվարչապետ եւ պաշպանության նախկին փոխնախարար Վահան Շիրխանյանը, որը նույնպես կասկածյալ է փողերի լվացման գործով, մայիսի 8-ին իր ընտանիքի հետ միասին կանչվել է Ազգային անվտանգության ծառայություն (ԱԱԾ) հարցաքննության: Ավելի ուշ նա ազատվել է: “Քանի որ ես ասելու ոչինչ չունեմ, նրանք ինձ ասացին, որ ինձ նորից կկանչեն հարցաքննության”, - ասաց նա EurasiaNet.-ին: Շիրխանյանի բնակարանում նույնպես խուզարկություն է անցկացվել:

“Քաղաքացիական անհնազանդություն շարժման” մեկ այլ անդամ Արկադի Կարապետյանը մայիսի 7-ի գործով հրավիրվել է ԱԱԾ հարցաքննության: Հրավիրվել են մի քանի ուրիշներ եւս։ [Մանրամասները տես Eurasia Insight archive.]

Հայաստանի քրեական օրենսգրքի 190 հոդվածին համապատասխան, Ազգային անվտանգության ծառայությունը մեղադրում է Արզումանյանին մոսկվայաբնակ Լեւոն Մարկոսից անօրինական կերպով 180 հազար դոլար ստանալու համար: Լեւոն Մարկոսը հետախուզվում է զեղծարարության մեղադրանքով: Համաձայն ԱԱԾ-ի՝ կալանքի առնչությամբ արած հայտարարության, ենթադրվում է, որ Մարկոսը փողը փոխանցել է ընտրությունների նախօրյակին ինչ-որ անկարգություններ հրահրելու նպատակով: Ըստ հայտարարության “նա որոշ նպատակներ է հետապնդում եւ ակնկալում է դրանք իրականացնել նախընտրական ժամանակահատվածում”:

Ավելի վաղ EurasiaNet-ին տված իր հարցազրույցում Արզումանյանը ժխտել է, թե նա հանդիպել էր Մարկոսին վերջերս Մոսկվա կատարած իր այցի ժամանակ, ինչն էլ, համաձայն հաղորդագրության, առաջացրել է քննիչների հետաքրքրությունը:

Ենթադրվում է, որ Մարկոսը նախկինում եղել է վարչապետ Սերժ Սարգսյանի հակառակորդը, չնայած այդ թշնամության մանրամասները հանրությանը հայտնի չեն: Այդ փաստը հուշել է որոշ ընդդիմադիր ղեկավարների հայտարարել, որ կալանքը եւ հետաքննությունը ունեն քաղաքական ենթատեքստ:

Ընդդիմադիր Ազգային Ժողովրդավարական Միության առաջնորդ եւ հետխորհրդային Հայաստանի առաջին վարչապետ (1990-1992) Վազգեն Մանուկյանը գործը որակում է “ծիծաղելի”:

“Ինչպե՞ս կարելի է 180 հազար դոլարով պետական հեղաշրջում իրականացնել”, հարցրեց Մանուկյանը իր աջակիցներին մայիսի 7-ին տեղի ունեցած հանրահավաքի ժամանակ:

Արամ Կարապետյանը՝ “Նոր Ժամանակներ” արմատական ընդդիմադիր կուսակցության առաջնորդը, որը վերջերս միավորել է իր ուժերը ընտրակեղծիքների դեմ ցույցեր կազմակերպող “Հանրապետություն” կուսակցության եւ “Իմպիչմենտ” դաշինքի հետ, կիսում է նրա թերահավատությունը:

“Նրանք փորձում են մեզ լռեցնել, զգուշացնում են՝ չշարժվեք, թե չէ նման գործ կհորինեն նաեւ մեր դեմ”, ասաց նա մայիսի 8-ի լրագրողների հետ հանդիպման ժամանակ: Արզումանյանը եւ Շիրխանյանը աշխատել են կառավարությունում Հայաստանի առաջին նախագահ Լեւոն Տեր-Պետրոսյանի օրոք:

Կառավարությունը դեռեւս մեկնաբանություններ չի արել կալանքի վերաբերյալ, բայց ԱԱԾ-ն հայտարարել է, որ “լուրջ հիմքեր” ունի հետաքննության համար։

Խմբագրի կողմից. Գայանե Աբրահամյանը ArmeniaNow անկախ առցանց շաբաթաթերթի լրագրող է Երեւանում։